Búgin Astanada «Qazaqstan 2050» jalpyulttyq qozǵalysynyń «Zhangyru» korporatıvtik oqytý» jobasy aıaqtalyp, joba jeńimpazdaryn marapattaý rásimi ótti, dep habarlaıdy Qozǵalystyń baspasóz qyzmeti.
«Zhangyru» korporatıvtik oqytý» jobasy aıasynda osy ýaqytqa deıin 50 qatysýshy eki apta qatarynan «jeke kóshbasshylyq», «bıznes», «úkimettik emes uıymdar» modýlderi boıynsha bilim alǵan bolatyn. Eki apta qatarynan jınaǵan bilimderin bıznes keıs jasaýǵa jumsaǵan qatysýshylardyń ishinen 10 úmitker iriktelip alyndy.
Bilim berý, jeke kóshbasshylyq daǵdysyn úıretý, kásipti jáne áleýmettik kásipkerlikti tıimdi júrgizýge beıimdeý arqyly adam kapıtalyn damytýdy maqsat etken jobaǵa elimizge tanymal bıznes pen buqaralyq aqparat ókilderi qazylyq etti. Qazylar quramynda Astana qalasy transport qaýymdastyǵynyń tóraǵasy, «Qazaqstan 2050» jalpyulttyq qozǵalysy Keńesiniń múshesi Medet Qurmanov, belgili telejýrnalıst, QR Investısııa jáne damý mınıstrliginiń qoǵammen baılanys departamentiniń basshysy – Mınıstrdiń keńesshisi Berik Ýálı, «ORDA-Astana» kópsalaly servıstik kompanııasynyń bas dırektory Evgenıı Bolgert, «GenevaBusinessSchool» О́kildigi» AQ atqarýshy dırektory Toǵjan Jumaǵulova, «Jobalardy basqarý tehnologııasy» jaýapkershiligi shekteýli seriktestiginiń dırektory Ivan Chýbısov boldy.
Tańdalǵan úmitkerler ózderine berilgen ýaqyt ishinde bıznes keısterin qorǵap, qazylar alqasynyń suraqtaryna jaýap berdi.
Qazylar alqasynyń sheshimimen MBA baǵdarlamasy boıynsha oqýǵa 25% jeńildikter Uljan Qoqybasova men Madına Kýsmanovaǵa, 50% jeńildik Ǵalym Dáýseıitke, 75% jeńildik Baqyt Qudabaevaǵa berilse, basty grant Dosan Qaýmenge berildi.
Jobany uıymdastyrýshy – «Qazaqstan 2050» jalpyulttyq qozǵalysy Keńesiniń tóraǵasy Muhtar Mankeevtiń aıtýynsha, «Zhangyru» korporatıvtik oqytý» jobasy rýhanı jańǵyrý taqyryby aıasynda ótkizilip otyr.
«Bul jobaǵa elimizdiń ár óńirinen 200-den astam adam qatysýǵa tilek bildirdi. Biz qazylar alqasyn quryp, olardyń ishinen 50-in joba qatysýshysy retinde tańdap aldyq. Tańdap alynǵan 50 qatysýshy ekiaptalyq trenıngterge qatysty. Qatysýshylar ózderiniń maqsattary men mindetterin júıeleı bilýdi, emosıonaldyq jaǵdaı men bıznesti basqarý strategııalary týraly bilim aldy. Jobalardy basqarýǵa arnalǵan jańasha tásilderdi júzege asyrýdy úırendi. Munyń barlyǵy azamattardyń kásibı biliktiligin jańǵyrtýǵa baǵyttalǵan. Bizdiń osy jobamyzǵa qoldaý tanytyp, bas seriktes bolǵan «SamrukKazynaTrust» áleýmettik jobalardy damytý qory erekshe ról atqardy. Sondaı-aq, «GenevaBusinessSchool» О́kildigi» AQ men «Jobalardy basqarý tehnologııasy» JShS bizge barynsha qoldaý tanytty», - dedi M.Mankeev.
Jeńimpazdar 2018 jylǵy naýryz aıynan bastap, 2 jyl boıy shveısarııalyq oqý ordasynyń baǵdarlamasy negizinde bilim alatyn bolady. Oqý ornyn sátti aıaqtaǵan túlekterge MVA dárjesi beriledi.